"क्वीज स्मारिका लोकार्पण तथा सम्मान समारोह" सम्पन्न

- विष्णु प्र. चापागाई

विश्व नेपाली साहित्य महासंघ र अन्तर्राष्ट्रिय नेपाली साहित्य समाज शाखा साउदी अरेवियाद्वारा संचालित "क्वीज स्मारिका लोकार्पण तथा सम्मान समारोह" साउदी स्थित नेपाली राजदूत श्री उदयराज पाण्डेको प्रमुख आतित्थ्यमा साउदी अरबको पुर्विय प्रान्त दमाममा आज सम्पन्न भएको छ । विनेसाम र अनेसासको पहलमा गरिएको अनलाइन हाजिरी जवाफ प्रतियोगिताले सफलता पूर्वका एक वर्ष पार गरेको उपलक्ष्यमा संस्थाको वार्षिक विवरण सहित प्रतियोगीहरुलाई पुरस्कार वितरण गरिएको थियो ।

हरेक महिना अनलाइनबाट सोधिने प्रश्नहरुको जवाफमध्ये धेरै भन्दा धेरै मिलाउने प्रतियोगीलाई नियमानुसार क्वीज मास्टर अफ द मन्थ घोषणा गरी नगद रु १००१ र वर्षमा लगातार ३ पटक सम्म क्वीज मास्टर अफ द मन्थ भएमा क्वीज मास्टर अफ द इयर छानिने र नगद रु ५००१ तथा प्रशंसा-पत्र प्रदान गरियो ।

सोही बमोजिम सोधिएका प्रश्नहरुको सबैभन्दा बढी पाँचपटक सम्म उत्तर मिलाई प्रतियोगीहरुमध्येका भाग्यशाली विजेता श्री नीरज सापकोटा क्वीज मास्टर अफ द इयर बनिनु भएको छ । विजयी प्रतियोगी नीरज सापकोटा अमेरिकामा रहनुभएकोले उहाँको पुरस्कार रासी र प्रशंसा-पत्र सम्माननीय राजदूत उदयराज पाण्डेको हातबाट विनेसाम केन्द्रिय कार्यालय नेपाल शाखा काठमाण्डौका प्रतिनिधीलाई हस्तान्तरण गर्नुभयो र क्वीज मास्टर अफ द मन्थ घोषणा हुनुभएका अन्य प्रतियोगीहरु सरोज अधिकारी (काभ्रे), देवराज लुइटेल (अनामनगर), भवानी आले (अनामनगर), गोपाल चन्द्र राइ (खोटाङ), एल एन खनाल (पोखरा) र नितिका प्रधान (बिराटनगर) को पुरस्कार रासी र प्रशंसापत्र पनि संवन्धित प्रतिनिधीलाई हस्तान्तरण गरिएको छ । उहाँहरुले विनेसामको नेपाल शाखा काठमाण्डौमा सम्पर्क गरी आफ्नो पुरस्कार लिन सक्नुहुनेछ ।