कतिफ-तारुतमा एनआरएनएको स्थानीय समन्वय समिति स्थापनासँगै उद्धारको चेक हस्तान्तरण

- श्रीकृष्ण श्रेष्ठ, दमाम

घाइते मोहन खतिवडाको सहयोगको लागि
रु. ४००००को चेक हस्तान्तरण गर्दै धरम के.सी.

एन आर एन ए लाई स्थानीय नेपाली कामदारहरूसम्म पुर्याउने उद्देश्यका साथ परिकल्पना गरिएको स्थानीय समन्वय समिति (LCC) को सांगठनिक संरचनालाई गतः ६ जनवरी २०१२ मा साउदी अरबको पुर्बी समुद्रतटीय प्रायदीप कतिफ-तारूतमा स्थापना गरिएको छ । एनआरएनए साउदी अरबको संशोधित बिधान बमोजिम पुर्बी क्षेत्रिय समिति अन्तर्गत गठित यो स्थानीय समितिमा रेशम पुन अध्यक्ष साथै रामचन्द्र पल्ली र सिताराम श्रेष्ठ सदस्यमा रहनुभएको छ । यो स्थानिय समिति अन्तर्गत हाल कूल ५१ जना सदस्यहरू पञ्जिकृत (दर्ता) भएका छन ।

पुर्बी क्षेत्रिय समितिका अध्यक्ष श्री कृष्ण श्रेष्ठको सभापतित्वमा सम्पन्न यो स्थानिय समिति स्थापना समारोहमा एनआरएनए साउदी अरबका अध्यक्ष धरम के.सी. प्रमुख अतिथी तथा महासचिव पुरूषोत्तम दास श्रेष्ठ, सदस्य सूर्य श्रेष्ठ र बिश्व नेपाली साहित्य महासंघ साउदी च्याप्टरका केन्द्रिय सदस्य बिष्णु प्रसाद चापागाई अतिथीका रूपमा उपस्थित हुनुहुन्थ्यो । पञ्जिकृत सदस्यहरूको उल्लेख्य उपस्थितीमा भएको यो समारोहलाई पुर्बी क्षेत्रिय समितिका सदस्य तथा लेबर टास्क फोर्स कमिटीका सदस्य चिन्तामणी राजनले सञ्चालन गर्नुभएको थियो । यस कार्यक्रममा सबै बक्ताहरूले नव वर्ष २०१२ को शुभकामना आदान प्रदान गर्नुका साथै क्षेत्रिय समितिका कोषाध्यक्ष शिव नारायण यादवले क्षेत्रिय समितिका गतिबिधीहरूबारे जानकारी गराउनुभएको थियो भने एनसिसी साउदी अरबका अध्यक्ष, महासचिव र सदस्य सूर्य श्रेष्ठले समग्र एनआरएनए र बिशेषतः एनसिसी साउदी अरबका बिगत, बर्तमान र भावी कार्यक्रमहरू बारे आफ्ना मन्तब्यहरू राख्नुभएको थियो । बिश्व नेपाली साहित्य महासंघ शाखा साउदी अरेवियाका केन्द्रिय सदस्य श्री बिष्णु प्र. चापागाईले पनि एनआरएनएका गतिबिधिहरूबारे जानकारी पाउंदा आंफु खुशी र उत्साहित बनेको र आंफु कार्यरत शहर रहिमा (रास्तानुरा)मा यस संस्थालाई अघि बढाउन लाग्ने अठोट जाहेर गर्नुभयो ।

यसै समारोहका बिच हालै मात्र ब्रेन ट्युमरका कारण गम्भीर बिरामी परी कतिफबाट नेपाल फर्की हाल उपचाररत रहनुभएका एनआरएनए साउदी अरबका पञ्जिकृत सदस्य (दर्ता नम्बर ३०८) मोहन खतिवडाको उपचारमा सहयोग पुर्याउन एनआरएनए साउदी अरबको कल्याणकारी कोषबाट उपलब्ध गराइएको रू. ४० हजारको चेक एनसिसी अध्यक्ष धरम के.सी.ले बिरामी सदस्यसम्म पुर्याइदिनका लागि नव गठित स्थानिय समितिका अध्यक्ष रेशम पुन र पुर्बी क्षेत्रिय समतिका सदस्य रामचन्द्र निरौलालाई संयुक्त रूपमा हस्तान्तरण गर्नुभएको थियो । रामचन्द्र निरौलाका अनुसार बिरामी मोहन खतिवडाको शुरूमा डा. उपेन्द्र देबकोटाको बांसबारी स्थित न्युरो अस्पतालमा जांच भएको र रोग यकिन भए पछि हालै मात्र थापाथलीस्थित नर्भिक अस्पतालमा ब्रेन ट्युमरको अपरेशन (उपचार) भएको छ । हाल वहां पोस्ट सर्जिकल ट्रिटमेन्ट (केमोथेरापी) गराउंदै हुनुहुन्छ । यस कार्यक्रममा उपस्थित सबैले सदस्य मोहन खतिवडाको शिघ्र स्वास्थ्य लाभको प्रार्थना गर्दै, पुर्ण रूपमा स्वस्थ भई पुर्बवत काम गर्न सक्षम हुनुहुने आसा एबम् शुभ कामना ब्यक्त गर्नुभयो ।