आप्पाले फेरि तोडे आफ्नै किर्तिमान

सगरमाथाका सफल आरोही आप्पा शेर्पाले आफ्नै कीर्तिमानलाई तोड्दै २०औं पटक सगरमाथामाथि विजय प्राप्त गरी नयाँ विश्वकीर्तिमान कायम गर्नुभएको छ।

एक वर्षघिको आफ्नो विश्वकीर्तिमान तोड्दै ५० वर्षको हिमाल आरोही आप्पाले शनिबार २०औं पटक विश्वको सर्वोच्च शिखर सगरमाथाको सफल आरोहण गर्नुभएको हो। आप्पाले शनिबार बिहान ८ बजेर ३४ मिनेट जाँदा आफ्नो कीर्तिमान तोड्नुभएको हो। ‘हाम्रो आवाजलाई तिमी सुन, अब हामी हिमालमा जलवायु परिवर्तनलाई रोक्न सक्छौं’ भन्ने सन्देशयुक्त झन्डा उहाँले सगरमाथाको चुचुरोमा फहराउनु भएको थियो।

जलवायु परिवर्तनबाट हिमाली क्षेत्रमा परेको प्रभावका बारेमा जनचेतना जगाउने उद्देश्यले शुरू भएको इको एभरेस्ट पर्वतारोहण टोलीका नाइके आप्पा जलवायु परिवर्तनसम्बन्धी र्सार्कका सद्भावना राजदूतसमेत हुनुहुन्छ।

विश्वमा जलवायु परिवर्तन विषयमा वकालत गर्दै आएका आरोही एवम् इको एभरेस्ट एक्सपिडिसनका संयोजक दावा स्टेभन शेर्पाले भन्नुभयो- ‘कोपनहेगनको जलवायु परिवर्तनको विश्वसम्मेलनपछि हिमालका बारेमा अझ व्यापक बहस गर्नुपरेको छ र विश्वलाई झकझक्याउनुपरेको छ। हाम्रो सफल आरोहणले विश्वलाई जलवायु परिवर्तनमा सबैले चासो दिनुपर्छ भने सन्देश दिएको छ।’

सन् १९९० देखि सगरमाथाको सफल आरोहण गर्न शुरू गर्नुभएका आप्पाले सन् १९९६ र सन् २००१ बाहेक हरेक वर्षसगरमाथाको आरोहण गर्दै सन् १९९२ को मे ८ र अक्टोबर १२ गरी एकै वर्ष २ पटक सगरमाथाको आरोहणसमेत गर्नुभएको छ।

सगरमाथा आधार शिविर

आप्पाले २७ वर्षको उमेरमा सन् १९८८ मा पहिलो पटक सगरमाथाको आरोहणप्रयास गरे पनि ८ हजार ५ सय मिटरको उचाइबाट फर्किनुपरेको थियो। दुई पटकसम्म लगातार असफल आप्पाले सन् १९९० मे १० मा पहिलो पटक सगरमाथाको सफल आरोहण गर्नुभएको थियो। आप्पाले शुक्रबार साउथ पोलको चौथो शिविरबाट बेलुका १० बजे चुचुरोमाथि आरोहण थाल्नुभएको थियो। उहाँ सोमबारसम्ममा आधारशिविरमा फर्किसक्ने नेपाल पर्वतारोहण संघका अध्यक्ष आङछिरिङ शेर्पाले बताउनुभयो।

सगरमाथाक्षेत्रमा रहेको फोहोरलाई संकलन गरेर आधारशिविरमा ल्याउने योजनासहित विश्ववन्यजन्तु कोषको सहयोगमा आप्पाले सगरमाथाको आरोहण गर्नुभएको हो। हालसम्म ३ हजार किलोग्राम फोहोर संकलन गरी आधारशिविरमा ल्याइएको एसिएन ट्रेकिङका अध्यक्ष शेर्पाले बताउनुभयो।

आप्पासँगै भारतका कान्छो आरोही १६ वर्षीय अर्जुन बाजपेयीले पनि सगरमाथामाथि विजय प्राप्त गरी नयाँ कीर्तिमान कायम गरेको पर्यटन उद्योग महाशाखाले जनाएको छ। उनले विश्वकीर्तिमान कायम गरेको भनिए तापनि उत्तरी भेगबाट अमेरिकाका १३ वर्षीय जोर्डनले पनि सगरमाथामाथि विजय प्राप्त गरेका छन्। यसअघि कम उमेरमा आरोहणको रेकर्ड दक्षिणी मोहडाबाट तेम्बाछिरी शेर्पा र उत्तरी पोलबाट मिङकपा शेर्पाको नाममा रहेको छ। उनीहरू दुवै जना क्रमशः १६ र १५ वर्ष ९ महिनाको हुँदा सगरमाथा चढेका थिए। उनीहरूभन्दा पहिले शम्भु तामाङले १८ वर्षमा सगरमाथाको आरोहण गरेको विश्वकीर्तिमान छ।

आप्पाले २०औं पटकसम्म सगरमाथा आरोहण गर्नुभएको समयतालिकाः-

श्रोतः नेपाल समाचारपत्र / आप्पा वीकीपेडिया