अनौठो आँपको रुख

कपिलवस्तु- जिल्लाको धनकौली स्थित बडिलवा गाउँमा आँपको अनौठो रुख देखिएको छ । यो देखेर सबै छक्क परेका छन् । आँपको रुखका हाँगाबिगा माथि नगई सबैलॆ भूईं छोएर पूनः माथि फर्किएका छन् । रुखका हाँगा सोझो नभएर बाङ्गोटिङ्गो र एकआपसमै बटारिएका छन् ।

प्रशस्त आँप फलेको उक्त रुख पटकपटक काट्ने प्रयास गरे पनि कसैले नसकेको स्थानीय ७० वर्षीय सीताराम कुर्मीले बताए । धेरै मान्छे रुख काट्न ठेक्का लिदै आए तर सबै अनेक घटना बेहोर्दै फर्किए । रुख ठूलो भएकाले इँटाभट्टाले किनेर काट्न आउँदा कहिले अकस्मात् मौरी आई टोक्न थाल्छन् भने कहिले रुख काट्नेहरु बेहोस् हुने गरेको ६० वर्षीय मंगल कहारले बताए ।

रुखमा दैवीशक्ति रहेको स्थानीयको विश्वास छ । यहाँ रुख काट्न आउनेमात्र नभई रुखका मालिक सूर्यलाल चौधरीलाई पनि बेलाबेलामा समस्या पर्छ । रुखमा आरा लगाउनासाथ सूर्यलालकी श्रीमती बौलाउने गर्छिन् । टाउको ठोक्दै रुखमा आएर माफी मागेर फर्कने गरेको गाउँलेले बताए । १० वर्षयता उनले रुख बेच्ने नाम पनि लिन चाहदैनन् । रुखमा दैवीशक्ति रहेको बताई गाउँलेले रुखको पूर्वपट्टि समयमाई स्थान बनाई पूजाआजा गर्न थालेका छन् । इँटाभट्टाका लागि रुख खरिद गरी काट्न आउने ३ भट्टा पनि चल्न नसकेर बन्द भएपछि अरु कसैले आँट गरेर रुख काट्न नसकेको स्थानीय रामभवन मल्लाहले बताए ।

साभारः कान्तिपुर दैनिक