ब्युटिफुल पिपुल

- विनु रिजाल

beenu.rijal@yahoo.com

सम्भवतः अंग्रेजीमा लेख्ने नेपाली लेखकहरूमा कान्छा लेखक हुन्- प्रदीप स्वाँर । १९ वर्षीय प्रदीपको उपन्यास 'ब्युटिफुल पिपुल' सार्वजनिक भएको छ । तीन वर्षअघिदेखि उनले यो उपन्यास लेख्न सुरु गरेका थिए । अंग्रेजी भाषामा लेखिएको यो उपन्यास भर्खर बामे सर्न थालेको अंग्रेजीलेखनको नेपाली बजारका लागि अवश्य महत्त्वपूर्ण हुनेछ । मातृभाषा अंग्रेजी नहुनेले १६ वर्षको उमेरदेखि नै अंग्रेजीमा लेख्नु चानचुने कुरो होइन । त्यसमाथि उपन्यास लेख्नु झन् गाह्रो काम हो । यसर्थ प्रदीपले प्रशंसनीय काम गरेका छन् । अंग्रेजीमा कलम चलाउन चाहने नेपाली युवापुस्ताका लागि ब्युटिफुल पिपुल प्रेरणाको स्रोत हो ।

दुई सय २५ पृष्ठको यो उपन्यासको कथावस्तु हो- हाल सिंगो विश्वलाई आक्रान्त पारिरहेको आतंकवाद । उपन्यासलाई ८२ अध्यायमा बाँडिएको छ । यसको कथा विश्वका सबै महादेशको सेरोफेरोमा घुमेको छ । उपन्यासमा एक रुसी र एक अमेरिकी परिवारको कथा समेटिएको छ । कथाका मुख्य पात्र ब्रान्डन तस्करीमा संलग्न छन् । ब्रान्डनलाई उसकी श्रीमती केरेनले पनि सहयोग गर्छिन् । छिटो पैसा कमाएर उच्चस्तरको जीवनशैली बाँच्न यो दम्पतीले तस्करी पेसा अँगालेको हुन्छ ।

उता, होटल व्यवसायमा संलग्न रुसी नागरिक एन्ड्रयु र उनकी श्रीमती मार्सिया पनि यस उपन्यासका मुख्य पात्र हुन् । काठमाडौँमा बस्ने ब्रान्डन परिवार र भारतमा बस्ने एन्ड्रयु परिवारको भेट उनीहरूका छोराहरूले गर्दा हुन्छ । ब्रान्डन जोडीको छोरा टोनी र एन्ड्रयु दम्पतीका जुम्ल्याहा छोरा डार्सिया र पिटर दार्जिलिङमा रहेको एउटै कन्भेन्ट स्कुलमा पढ्छन् । कथाका अन्य पात्र मिस्टर अग्रवाल, ओमार, अब्दुल्ला आदि छन् । यी तीनै पात्र तस्करी र आतंकवादसँग सम्बन्धित छन् ।

ब्रान्डन तस्करी गरेर रातारात समृद्ध बन्छन् । यसैगरी, एन्ड्रयु पनि छिट्टै भारतमा होटलको सञ्जाल विस्तार गर्न सफल हुन्छन् । एन्ड्रयुलाई सफल हुन सहयोग गर्छन् मिस्टर अग्रवालले । तर, अग्रवालको ओमारसँग सम्बन्ध भएको थाहा पाएपछि एन्ड्रयु र अग्रवालको सम्बन्ध बिग्रन्छ ।

अब्दुल्ला र ओमारले एन्ड्रयुका छोरा डार्सियासहित १२/१३ जना बच्चालाई अपहरण गर्छन् । विश्वलाई एकछिन स्तब्ध पार्न सफल अपहरणकारीहरूमध्ये अब्दुल्लालाई अपहरित किशोर-किशोरीले मारिदिन्छन् ।

उपन्यासमा लेखक स्वाँरले जासुसी उपन्यासमा जस्तो थुप्रै सस्पेन्स राखेका छन् । सस्पेन्स, थ्रिलर आदिमा रुचि भएका पाठकलाई उपन्यासले आकषिर्त गर्छ । पाठकलाई पुस्तक पढुन्जेल अब के हुन्छ होला भन्ने कौतूहल भइरहन्छ । उपन्यासमा वाक्य छरिता र छोटा छन् । भाषा एकदम सरल छ । अंग्रेजीमा त्यति धेरै दख्खल नभएका पाठकलाई समेत उपन्यास पछ्याउन कुनै कठिनाइ हुदैन ।

तर, लेखकले कलिलो उमेरमै लेखेको उपन्यास भएर होला उपन्यासमा गहिराइ भेटिँदैन । कथा सतही छ । पात्र पनि सतही लाग्छन् । पात्र-निर्माणमा उपन्यासकार चुकेका देखिन्छन् । केही घटनालाई राम्ररी व्याख्या नगर्दा पाठक उपन्यासको सुरुसुरुमा केही अलमलिन्छन् । उपन्यासमा ओमार र अब्दुल्लाले एन्ड्रयुलाई सहयोग गर्न मिस्टर अग्रवाललाई अह्राउँछन् । तर, यसपछाडिका कारणबारे उपान्यासकारले प्रस्ट नपार्दा कथा कतै अड्किएजस्तो लाग्छ । एन्ड्रयु कसरी यति छिट्टै सेलिब्रेटी होटल व्यवसायी बन्न सफल भए, त्यति स्पष्ट पारिएको छैन । 'ब्युटिफुल पिपुल' उपन्यासको कथा कता-कता मसलेदार थि्रलर बलिउड फिल्मको कथाजस्तो पनि भान हुन्छ ।

स-साना अध्यायमा बाँडिएका यो उपन्यास केही छरिएको छ । उपन्यासलाई यति धेरै अध्यायमा बाँडिनुपछाडि कुनै तुक देखिँदैन । उपन्यासको सम्पादनमा बिल्कुल ध्यान दिइएको छैन । तर, यति भन्न सकिन्छ- ब्युटिफुल पिपुल टिनएजर पाठकका लागि बढी उपयुक्त छ ।

नयाँ पत्रिकाबाट