– धरम के.सी.
बिबाह भएको केही महिनामै पेटमा गर्भ लिएर माइती फर्केकी सुर्खेत लाटिकोइली – ४ नयां घुस्रा की निर्मला चौधरी फेरी कहिल्यै फर्किनन् आफ्नो पतिको घरमा । किन त? भन्ने मेरो जिज्ञासामा उनले “मलाई मेरो बिगत नसोध्नुहोस” भन्दै रूनै थाले पछि मैले त्यो प्रश्न फेरी दोहोर्याइन । उनले माइती मै जन्माएकी ती छोरी अहिले ७ बर्षकी भैसकेकी छिन् । उनको त्यो अब्यक्त बेदना पक्कै निकै गहिरो रहेको अनुमान गरें मैले ।
यसरी नै नेपालमा हाम्रा छोरी चेली, दिदी बहिनीहरू कुनै न कुनै ठोकर (चोट) खाएरै बांकी जिन्दगी जिउने चिन्तामा छटपटाइरहेको बेला हाम्रै नेपाली दलालहरूले भावनात्मक अपहरण गर्दै, सपनाका स्वर्णिम संसार देखाउंदै, ललाई फकाई भारत हुंदै खाडीका मुलुकहरूमा ल्याइपुर्याएका छन । निर्मला तिनै अभागी चेलीहरूमध्येकी एक हुन् ।
