मुक्तकहरु

- विष्णु बैकुण्ठे

१.

दुःख कति गरेँ गनिसाध्य छैन

आँशु कति झारेँ भनिसाध्य छैन

पौरख गरे स्वदेशमै सुखी रहिन्छ
कमाउन विदेशमै जानु बाध्य छैन

२.उतिखेर माया पनि धेरै भयो सस्तो
आज बल्ल थाहा भो मरुभूमी कस्तो
पृयाले सम्झाउँदा उल्टो खेदियो
नपाइने नै रहेछ जन्मभूमी जस्तो

३.
नेपालमै मन भए पनि विदेशमा पाऊ छ
विछोड र वेदनाका हृदयभरी घाऊ छ
दशनङ्ग्रा खियाउन अब विदेशिन्न
फर्कि जान्छु गाउमै आफ्नै ठूलो भाऊ छ

४.
कल्याणकारी भाषणको गीत यस्तै छ
साँढे जुध्दा बाछो मिच्ने जीत यस्तै छ
नालायक नै नायक बन्दा देश भ्रष्ट भो
एउटा रुँदा अर्को हाँस्ने रित यस्तै छ

५.
पहिलो भेटमै नजरको वाण लाग्यो तिमीलाई
मोहिनीको ब्रम्हस्त्रले हिर्काई भाग्यो तिमीलाई
प्रेमको घाऊमा मल्हमपट्टी गर्ने साथी पाउँदा
सँगै बसी जून हेर्ने इच्छा जाग्यो तिमीलाई