- देवेन्द्र सारु मगर 'मीक्डी'
मगर समुदायको अति नै लोकप्रिय पर्ब हो पन्ध्र पुस । गाउ घर तिर मगर युवाहरुलाई मगर युवतीहरुले पन्ध्र पुस ख्वाउने चलन पनि रही आएको छ । पन्ध्र पुस आउनु भन्दा २४ दिन अगावै मगर युवतीहरुले मगर साइनो अनुसार सालीभान्जी निम्तो स्वरुप सुपारी बाँडेर निम्तोको पक्का गर्दछन् । प्रायःजसो सबैलाई पायक पर्ने ठाऊँ गाऊँको कुनै ठूला वडा मुखियाको घरमा पन्ध्र पुस मनाउने अर्थात पन्ध्र पुस खुवाउने कार्यक्रम तय भै सकि पछि पन्ध्र पुसको अघिल्लो दिनको साँझ आफ्नो मौलिक परम्पराभेषभुषामा सजिएर मगर युवा युवति जम्मा हुने गर्दछन् । त्यस पछि शुरु हुन्छ कार्यक्रमको पहिलो प्रहर मुखियाको अनुमति अनुसार सबैलाई आँगन भरि लामबद्य तरिकाले पलेटीमा बसाल्छन् अनि सबै पाहुनाहरुलाई मीठा मीठा परिकार खान दिन्छन् । सालको पात चट्ट बुनेर सजाइएको टपरीमा सुँगुरका मासु मासको बटुकबारा संगै शुद्ध; कोदोको झोल सीमित मात्रामा विस्तारै ग्रहण गरि सके पछि मगर समुदायकै अतिनै प्रचलित नाँच झाम्रे झयाउरे रातभरि जग्राम बसी भोली पल्ट दिनभरि सम्म नचाई १५ पुस मनाउने परम्परा रही आएको छ ।
